Фарғона шаҳрида Халқаро ногиронлар куни муносабати билан байрам тадбири ташкил этилди

2024 йил 2 декабрь куни ушбу сана арафасида имконияти чекланган фуқароларни яна бир бор қўллаб-қувватлаш мақсадида ҳайрия тадбири ўтказилди.

Тадбирда Фарғона вилоят ҳокимли, Маданият бошқармаси, Ўзбекистон нодавлат нотижорат ташкилотлари миллий ассоциацияси Фарғона вилоят ҳудудий бўлинмаси, вилоят Жамоат фонди, Ўзбекистон ҳакамлик судлари ассоциацияси ҳамда ногиронлиги бўлган шахсларнинг ҳуқуқ ва манфаатларини ҳимоя қилувчи ННТлар иштирок этишди.

Вилоятимизда яшовчи Ўзбекистон ногиронлар жамияти Фарғона вилоят бўлими, Карлар жамияти, Кўзи ожизлар жамияти, Афғончилар уюшмаси, Чернобильчилар уюшмаси, мурувват уйи ва махсус мактаб интернати тарбияланувчилари таклиф этилган тадбирда вилоят ҳокимининг ўринбосари Бурҳонжон Қўлдошев сўзга чиқиб, Давлатимиз раҳбарининг алоҳида эътибори ва ғамхўрлиги, амалга оширилаётган ислоҳотларнинг марказида инсон қадрини улуғлаш, аҳолининг ижтимоий ҳимояга муҳтож қатламини қўллаб-қувватлаш турганлиги натижасида тақдир тақозоси билан ногирон бўлиб қолган юртдошларимиз доимий меҳр ва эътиборда бўлиб келаётганини қайд этди.

Тадбир давомида иштирокчиларга совғалар топширилди.

Вилоятимиз санъаткорларининг куй-қўшиқлари эса барчага байрамона кайфият улашди.